Ang BUSECO kauban sa PeakPower Bukidnon Inc. kinasing-kasing nga nagtabang sa lungsod sa Manolo Fortich pinaagi sa pagdonar ug 5,500 ka surgical gloves ug 11,000 ka surgical facemasks alang sa mga frontliners nga nagsakripisyo ug nakig-bisog kontra COVID-19. Ang maong donasyon gipaabot sa LGU-MF ni BUSECO OIC-General Manager Cristopher Dulfo, BUSECO Director for Manolo nga si Elvy Tinay, BUSECO Director Libona Edna Malazarte ug Engr. Kenneth Chamen ug Engr. Ronald Cajilla gikan usab sa PeakPower Bukidnon Inc.
Samtang sa laing bahin, gihatud usab sa kadagkuan sa BUSECO ang maayong balita bahin sa pag-implementar niini sa “PANTAWID LIWANAG” program nga usa ka programa nga maghatag ug ayuda o tabang pinaagi sa libre nga kurente sulod sa usa ka bulan ngadto sa mga lifeliner nga direktang naapektuhan sa COVID-19. Ang makabenipisyo kato lamang mga Residensiyal nga Konsumante nga nikunsumo ug 1 kWh hangtod 25 kWh sa bulan sa Abril 2020 nga gi-ila nga lifeline consumers subay sa section 73 sa R.A. 9136 kon EPIRA ug sa klasipikasyon nga gi-aprobahan sa Energy Regulatory Commission pinaagi sa desisyon sa ERC Case No. 2001-929. Mao kini sila ang gi-ila nga “marginalized” kon kabos nga konsumante.
Kini usa ka inisyatibo sa mga Electric Cooperatives pinangulohan sa Philippine Rural Electric Cooperatives Association, Inc. (PHILRECA) kauban sa National Association of General Managers of Electric Cooperatives (NAGMEC) ug gisuportahan sa National Electrification Administration (NEA).
Sa distrito sa Manolo Fortich, adunay 5,823 ka mga benepisyaryo diin ang total nga ayuda mikabat sa Php 545,956.85.
